NN
***
Assalamualaikom kawom sinaroe
Agam ngon binoe tuha ngon muda
Taduek di rumoh wahe rakan droe
Kareuna nanggroe dalam beuncana
Virus Corona bahya han bagoe
Tanyoe meupaloe meunyoe ka teuka
Kumeun meujangket saket lam asoe
Le that nyang kawoe u alam baqa
Wajeb ta pateh peurintah dokto
Pomeurintah geutanyoe seureuta ulama
Meunyoe ta langga meunyeusai dudoe
Virus jameuen nyoe keubiet bahaya
Bak rame ramee bek na geutanyoe
Hanjeuet duek toe toe ta peugah haba
Virus meunula ateueh geutanyoe
Ingat hai adoe kawon syedara
Di cong bak langsat totok beuragoe
Di cong bak panjoe tupee meudoda
Ta duek di rumoh wahe sambinoe
Bek tajak saho hai bungong jeumpa
Di ulon tuan ka lapan uroe
Di rumoh sinoe ta karantina
Lon duek di rumoh hana jak sahoe
Takot geutanyoe virus bahaya
Taduek di rumoh tanyoe samlakoe
Baca tiep uroe Quran mulia
Ilmu agama wajeb meurunoe
Pue lom ka rap toe buleuen puasa
Silaturahim ngon syedara droe
HP bak jaroe neu halo sigra
Ngon keuluarga hana jeut tuwoe
Kadang di rantoe han troh ta gisa
Di langet manyang na mata uroe
Cahya u bumoe ngon peutrang donya
Haba peuingat mumada oh noe
Me’ah keukamoe wahe syedara…
***
Aceh, 31/03/20
